॥श्री दत्त गणपति भजनम्॥

श्री दत्त गणपतिं भजे उन्मत्त नटन ताण्डवम्।
मत्तेभवदन भासुरं चित्ताब्ज्य बोध भास्करम्॥१॥

आयत्त योगरजितं वित्तेश नित्य पूजितम्।
उत्तानपाणि मुद्रितं श्री कृत्तिवाससः सुतं॥२॥

कैलासदृषदि नर्तनं भक्तान्तरंगवर्तनम्।
पापौघ पाशकर्तनं श्री पार्वतीसुतं भजे॥३॥

लंबोदराङ्ग ताण्डवं मुद्राकराब्ज पण्डितम्।
सर्वाङ्ग नाग मण्डनं वन्दे विनायकं पतिम्॥४॥

धिन्धिं मितकिट मर्तलं भंभं निनाद शङ्खकम्।
आनन्द नृत्यतत्परं ध्यायामि प्रमथनायकम्॥५॥

आमोदकर मोदकं वेदान्तमति मादकम्।
दुष्कर्म फल साधकं विघ्नेश्वरं गुरुं भजे॥६॥

सृष्टि स्थिति लय कारणं मूषाख्य दैत्य मारणम्।
संसार जलधि तारणं स्तौमि प्रभु नरवारणम्॥७॥

पञ्चास्यमादि दैवतं देवर्षिभिः समर्चितम्।
आलोक गलित सञ्चितं विघ्नाधिनाथमाश्रये॥८॥

लोकैक परम वैभवं लोकेश्वरादि संभवम्।
आलोक परिहृतोद्भवं आलोकये परंभवम्॥९॥

श्री कृष्ण कवि निवेदितैः श्लोकाख्य मोदकैरिमैः।
आनन्द गणपतिं पतिं आराधयन्तु साधकाः॥१०॥

श्री दत्त गणपतिं भजे। श्री दत्त गणपतिं भजे। श्री दत्त गणपतिं भजे॥

To download this bhajan sung by H H Shri Dattaswami, right click and save link as here.